【A&M Diary】平時返工時間嘅觀塘真係好煩囂，人來人往，又熱又迫。好難得俾我哋搵到一個慢活嘅淨土，呢度就係創紀之城一期嘅哥哥添飯•妹妹泡茶。餐廳主打台灣菜，設計簡約文青，真係可以將忙碌嘅工作暫時放低，好好享受辛勞工作後嘅晚餐。
肉鬆蛋餅
去台灣旅行，我就最鍾意食蛋餅。哥哥添飯妹妹泡茶嘅蛋餅款式選擇算多，不過，由於M佬係唔食芝士，所以我就揀咗肉鬆蛋餅。肉鬆蛋餅預先切開四件，所以食嘅時候非常方便。蛋餅嘅蛋味濃香，而肉鬆份量超多，口感鬆脆，鹹香惹味。
大大塊炸豬扒
至於小食就揀咗大大塊炸豬扒，呢塊豬扒真係好大塊又厚切，炸到脆卜卜，鎖住豬扒嘅肉汁，非常juicy！
花膠胡椒豬肚雞
呢個係逢星期一、三及五限定嘅套餐，首先套餐會附送三款時令前菜，今日就有椒鹽爆溪蝦、苦瓜冷盤同漬物拼盤，而我就特別鍾意佢個苦瓜冷盤，因為非常甘香！除此之外，仲有一碗滷肉青菜，令呢個套餐加點綠色。當然重點就係花膠胡椒豬肚雞湯配白飯啦！呢碗花膠胡椒豬肚雞湯真係份量十足，首先雞肉非常嫩滑，雞皮又唔會太肥，重點係勁多雞件呀，食極都仲有好多，非常足料；至於豬肚洗得非常乾淨，口感爽口；另外，花膠都有好多，膠質豐富。呢3款主要食材加上香濃胡椒味，令湯底非常鮮甜又有層次，如果想加添口感，仲可以落埋炸脆米添。
哥哥招牌塩麴雞拼傳統台南香菇蝦米油飯
呢個塩麴雞嘅表面淋上酒釀米粒，酒味唔會好強，但我就略嫌鹹咗少少。至於雞肉就好嫩滑又入味，用嚟送飯就一流喇！但最特別嘅就係台南香菇蝦米油飯，飯身充滿菇香同蝦米香味，非常有層次。至於呢兩款套餐都會附送甜品，今日就有紅豆綠茶蕨餅，口感煙煙韌韌，又唔會太甜。
老細萬歲黑糖珍珠厚奶茶、水蜜桃果粒愛玉
至於飲品方面，我哋就叫咗老細萬歲黑糖珍珠厚奶茶同水蜜桃果粒愛玉。兩款飲品我哋都唔記得咗叫小甜，好彩一啲都唔甜，特別係老細萬歲黑糖珍珠厚奶茶，茶味濃香奶滑，而黑糖比例啱啱好，好驚喜。
