【A&M Diary】香港雖然無荷蘭式風車，但就有期間限定嘅荷蘭式花海喇！今日我哋行萬宜水庫東壩嘅時候，就順便嚟到位於西貢嘅隱世村莊 – 白腊村。雖然白腊村嘅荷蘭式花海係期間限定，不過，呢度都有啱晒打卡嘅彩色屋仔，加上仲有一間臨海士多，啱晒行麥里浩徑一段（萬宜水庫段）嘅時候作中段休息補給啦！
前往方法
巴士：於港鐵鑽石山站或西貢市中心坐九巴96R至北潭涌落車，再轉乘的士前往
街渡：於西貢碼頭搭45分鐘船，即可到達，但船費則以人數由船主釐定
提提你
1. 旁邊就係附近居民居住嘅地方，所以大家遊玩參觀嘅時候，記住保持寧靜
2. 大家記住保持環境清潔，自己垃圾自己帶走
3. 白腊村蚊蟲眾多，應做足防蚊措施
白腊村
位於西貢嘅白腊村係一條超過三百年歷史嘅客家村莊，由於白腊村嘅交通唔方便，所以非常隱秘。但近年村民將村落翻新，加上種植多個品種嘅鬱金香，吸引咗唔少遊客，令白腊村變成人氣景點。
白腊村花海
白腊村之所以為人熟悉，全因為每年3月嘅鬱金香花海！村民會種植多種色彩繽紛嘅鬱金香，令白腊村花海成為一個打卡嘅熱點！但有唔少遊客就反映，鬱金香花田對外宣稱係免費參觀，但入到嚟之後就發現需要收取入場費而大失預算。不過，我哋今日嚟到，由於唔係鬱金香花海嘅季節，加上只有少少嘅小黃花，所以就未有收取入場費喇！
白腊村彩色小屋
花海雖然係期間限定，但入到嚟白腊村，仲有代表白腊村嘅地標：彩色小屋！近年翻新嘅時候，村民就將歷史悠久嘅客家村莊外牆油上唔同顏色，令古舊嘅村莊搖身一變，令大家彷彿置身外國嘅小鎮！呢個小鎮絕對係啱晒大家影相打卡呀！
白腊村海灘
冬天嘅時候，白腊村海灘會成為唔少露營朋友喜愛嘅紮營地點；至於夏天嘅白腊村海灘當然就是潛水、浮潛、游水同曬太陽嘅熱門地點啦！白腊村海灘因為水清沙幼，海景靜美，所以有港版馬爾代夫之稱。
