【A&M Diary】潮流興露營，所以繼上次去欣澳玩「車中泊」堤邊野餐之後，今次就轉個場地，嚟到下城門水塘主壩再玩「車中泊」。我哋嘅「車中泊」同一般人唔同，因為過夜露營唔太啱瞓慣床嘅我哋，所以我哋嚟個車尾野餐Picnic，以滿足「車中泊」打卡願望，食吓嘢再飲吓嘢，真係好chill呀！
提提你
1. 下城門水塘主壩旁邊有唔少草叢，大家除咗要做好防蚊措施，更要小心蜜蜂同附近嘅馬騮
2. 另外，如果要生火，記住唔好留低任何火種，以防山火
3. 今次嘅野餐地點其實係馬路上，泊車同野餐時候，記住以唔好影響其他駕駛者為大原則
4. 下城門水塘主壩附近並無洗手間設施
5. 大家記住保持環境清潔，自己垃圾自己帶走，絕對唔可以破壞大自然環境
下城門水塘主壩
只要喺Google Map輸入下城門水塘主壩，就可以輕鬆到達目的地，沿路並無任何難度！嚟到下城門水塘主壩，面前就有一個峽谷，有唔少人鍾意嚟到呢到放吓航拍同遙控飛機！另外，從峽谷望落去，就會見到城門水塘，不過因為依家季節相對乾旱，所以望落去城門水塘嘅水都比較少。
車尾野餐
我哋泊好車之後，面對住峽谷就開始我哋嘅野餐活動喇！上次喺欣澳野餐，A姐準備嘅食物都提前煮熟，用暖壺保溫。今次話明係2.0，所以我哋都要有啲改變，今次嘅嘢食全部都係生架！我哋唔係準備魚生刺身，只係我哋預備咗一個一次性嘅燒烤爐同露營用嘅氣體爐具，嚟一次野坎體驗！
