【A&M Diary】「那段年月有多好，怎麼以後碰不到。」隨住城市發展，下一個將會被消失嘅就係灣仔分域碼頭。分域碼頭曾經係香港一個軍人碼頭，最高峰時每日接待超過50,000名海軍人員。隨住主權移交，填海工程同海岸線遷移，分域碼頭已經失去原有嘅用途，變成一個充滿外國風情嘅小型商場。大家想去影相打卡留下回憶，就要趁清拆前把握時間喇！
前往方法
1. 港鐵：由灣仔港鐵站前往會展方向，經過君悅酒店後，碼頭位於演藝學院對面
2. 自駕遊：喺分域碼頭附近有少量咪錶停車位，或於分域碼頭內作任何消費，即可獲得1小時免費泊車
分域碼頭
分域碼頭最初係一個私人碼頭，直至越戰時期，成為美軍遠東補給站。碼頭亦同時招待訪港嘅美國或外國軍艦，亦設有美國海軍駐港辦公室，高峰時期曾同時接待超過50,000名海軍人員。所以當年碼頭內嘅商場主要供登岸水兵購物，全盛時期有西裝店、皮草店、鞋店、珠寶、鐘錶、找換、書報、影音、傢俬、地毯、貸款、電訊、運動用品、酒類、樂器等各類商店。海軍商場仲保留住以前嘅建築風格，充滿海軍風情，同時仲根據傳統，現時亦放有旅遊指南供水兵/遊客取閱。
意大利餐廳：Giá Trattoria Italiana
分域碼頭內嘅商店唔多，餐廳方面就仲有呢間食意大利菜嘅Giá Trattoria Italiana。不過，我哋今次就無嚟呢度食飯，所以未能為大家詳細介紹，只可以話身邊有朋友食過，表示都幾正宗架！
