【A&M Diary】近年無得返日本家鄉，所以多咗好多人尋訪港版嘅Omakase（廚師發板）。由於主打Omakase嘅餐廳選擇越嚟越多，價錢亦越嚟越親民，令Omakase唔再係遙不可及。今日嚟到南昌站V Walk嘅漁釧，呢度嘅和風料理選擇非常全面，近期亦推出震撼價HK$298嘅Omakase，究竟係唔係真係咁抵，一於帶A姐去試吓啦！
一人前Omakase：前菜
前菜就係魚仔，鹹香十足。
一人前Omakase：沙律
前菜就係和風沙律，新鮮嘅蔬菜同車厘茄配上胡麻醬，都夠開胃。
一人前Omakase：汁物
日本菜嘅湯當然就係麵豉湯啦，夠晒熱辣辣！
一人前Omakase：天婦羅
天婦羅即叫即炸，Omakase套餐會有三件，分別係蝦、茄子同南瓜。炸粉唔厚，非常香口。
一人前Omakase：刺身三點
食完三道前菜同天婦羅，就梗係要嚟重點之一嘅刺身啦！話說Omakase係根據當日新鮮嘅食材，再由廚師了解食客嘅喜好，由淡口嘅白身魚食到較濃嘅赤身魚。雖然呢度嘅Omakase一切從簡，直接將三款刺身奉上，但呢個價錢食到新鮮嘅刺身，已經夠晒驚喜！三款刺身分別係中拖羅、三文魚同鯛魚，全部都勁厚切，特別鍾意油脂豐富嘅三文魚，口感豐富。
一人前Omakase：壽司九貫
至於壽司就有九件，今日廚師就幫我揀咗三文魚、赤身、劍魚腩、赤蝦、帆立貝、鱲魚
、炙燒三文魚、炙燒和牛同炙燒左口魚邊。呢9件壽司全部手握，飯身軟熟，特別鍾意超鮮甜嘅赤蝦同帆立貝。
大拖羅壽司
除咗Omakase，我哋亦叫咗平時去日本必食嘅大拖羅，拖羅夠厚身，肉質綿滑，魚油豐富，亦完全無筋，唔錯。
軟殼蟹蟹卷
餐廳亦推出唔少自家卷物，入面嘅軟殼蟹炸到非常香脆，同軟綿嘅飯身形成強烈對比。但我哋就略嫌卷得唔夠實，所以食嘅時候好易鬆散。
蟹肉玉子燒
玉子燒夠晒熱辣辣，而且蛋香十足。上面放有蟹肉同勁多蟹籽，口感非常有層次。我哋就覺得如果可以將蟹肉放喺玉子燒內就更完美喇。
