【A&M Diary】天婦羅一直都唔係A姐嘅最愛，無論去放題定日式和食店，佢都同天婦羅絕緣，除咗呢間位於旺角朗豪坊嘅天吉屋。天吉屋係嚟自日本東京嘅過江龍名店，更連續五年榮獲日本丼聯盟天丼金賞獎嘅光環，天婦羅即叫即炒，加上鬆脆嘅口感，就打動咗A姐喇！
無限添加
待餐期間，店員就會送上沙律菜，加埋柚子醋一齊食就寧舍開胃，特別適合依家夏天炎熱嘅季節。另外，枱上面放有牛蒡漬物同醃製蘿蔔，仲有解喝嘅牛蒡茶，全部都係無限量添加！
天幕御膳
無論係第一次嚟天吉屋，定係第N次嚟到，都一定會叫天幕御膳！因為天幕御膳可以一次過體驗三種食法：第一個方法，就係最基本嘅天婦羅食法，直接將天婦羅點上加入蘿蔔蓉嘅醬汁；第二個食法就相對適合濃味嘅朋友，將天丼醬汁+白飯+天婦羅一齊食；而第三個食法就係加入鰹魚湯變成泡飯。至於呢個定食有黑虎蝦天婦羅、海紅鯛配紫蘇葉天婦羅、軟殼蟹天婦羅、洋蔥天婦羅、魷魚天婦羅、茄子天婦羅、南瓜天婦羅同紫菜天婦羅。天婦羅炸漿夠薄，香酥脆口。呢度嘅黑虎蝦天婦羅絕對唔會令你失望，因為蝦身夠厚，非常彈牙，好有口感。順帶一提，天幕御膳嘅白飯係無限添加㗎！
軟殼蟹丼
除咗黑虎蝦天婦羅，呢度嘅軟殼蟹天婦羅都唔會令你失望，所以我哋特登叫咗一個主打軟殼蟹嘅軟殼蟹丼。軟殼蟹天婦羅份量好多，除咗唔係軟殼嘅蟹蓋同蟹鉗之外，成隻蟹基本上齊晒。啲蟹腳上面仲帶有勁多蟹膏，好滋味又夠滿足。呢個丼飯上面除咗軟殼蟹，仲有南瓜天婦羅、茄子天婦羅、溫泉蛋天婦羅同雜錦天婦羅。不過略嫌飯就比較少，同埋呢個丼嘅白飯係唔可以無限添加。
