【A&M Diary】相信你一定知道失而復得嘅感覺，但如果失而復得之後，你仍然唔識得珍惜，咁真係無話可說喇！曾經喺銅鑼灣開業多年，未食過都一定經過嘅蛇王二，原來由原班人馬喺灣仔重開，新開嘅舖頭重新命名為蛇王易，餐牌同以前大致一樣，除咗蛇羹，仲有糯米飯同燒臘飯，夠晒港式地道。
秘製菊花蛇羹
有人話「秋風起，最啱食野味」，但喺香港，蛇係唯一可以合法食到嘅野味，所以每年嘅秋冬季節，香港人就鍾意食蛇宴補身暖胃。蛇王易嘅菊花蛇羹材料十足，湯色清澈但味道濃郁，蛇肉比例多，唔腥又夠鮮甜，濃稠適中，味道好有層次。蛇羹表面放上幾片有清肝明目功效嘅菊花，又可以增加蛇羹的清新口感。
淮杞燉竹絲雞湯
A姐唔食蛇羹，所以就叫咗一個燉湯俾佢，燉湯原汁原味，夠晒足料，入面有一大舊烏雞雞胸肉同烏雞雞全翼，當然仲有唔少淮杞啦！燉湯無加味精，湯色清澈池，味道鮮甜。
臘味糯米飯
冬天除咗食蛇羹，又點少得糯米飯呢位朋友呢？糯米飯有好多臘肉同蝦米，糯米飯索晒佢哋嘅香味，油香十足，加埋花生一齊食令口感大大提升。我哋特別加咗半條臘腸同半條脆皮膶腸，脆皮膶腸係呢度嘅名物，個皮真係超級脆，而且肝味濃郁，爆juicy。
脆皮燒肉配燒鵝飯
燒臘飯亦係呢度嘅代表，燒肉一層肥一層瘦，一啲都唔油膩，當然最正就係燒肉皮，超脆呀！另外，燒鵝嘅鵝油十足，皮香肉滑。
