【A&M Diary】放假去離島玩係唔少遊客嘅心水選擇，最受香港人歡迎嘅離島點少得長洲、南丫島同大嶼山呢？喺咁多個離島之中，曾為工業小島嘅坪洲經常俾人遺忘，所以相對寧靜，係一個適合大家慢活享受假期嘅小島。其實坪洲亦有唔少打卡景點、行山郊遊同人氣食店，真係玩大半日都冇問題。今日我就同A姐plan好行程，由坪洲玩到去愉景灣，嚟個周末打卡旅行團！
前往方法
中環港外線6號碼頭搭渡海小輪，船程大約30-40分鐘（船期表）
提提你
1. 坪洲係一個寧靜嘅小島，遊覽時保持聲浪，唔好騷擾居民
2. 大家記住保持環境清潔，自己垃圾自己帶走，絕對唔可以破壞大自然環境
3. 洗手間主要集中喺碼頭、市政大樓同商店街一帶
4. 坪洲嘅行山路線難度唔高，適合行山初哥同一家大細，但都要量力以為
第一站：史諾比石
詳情：漫遊坪愉徑靚景 必影坪洲史諾比石
落咗船之後，我哋先喺超級市場買定啲補給品，再往島嘅右手邊坪愉徑出發，坪愉徑嘅路線難度唔高，沿途可以眺望愉景灣同迪士尼樂園，當然，我哋嘅目標係好似Snoopy嘅史諾比石啦！
第二站：東灣沙灘
睇完史諾比石，我哋不走回頭路，繼續往山嘅方向行，轉入坪洲家樂徑，經過大龍村，就會到達坪洲唯一嘅沙灘：東灣沙灘。夏天嘅時候，有唔少遊客玩水上活動、曬太陽同游水。不過，要留意海灘並唔係康文署規管範圍，所以無救生員當值，大家記住要注意安全。
第三站：龍母廟
坪洲雖然只有0.99平方公里，但作為一個離島當然有唔少廟宇，其中最大嘅就係龍母廟。龍母廟金碧輝煌，並設「龍恩浩蕩千秋耀，母德巍峨萬載昭」嘅金字牌匾，好有氣勢。廟內又設龍床，聽講摸過龍床就會好運，而用廟前嘅龍水洗手又可添運勢。所以每年農曆五月初八嘅龍母誕，就有唔少善信嚟祈福。
第四站：祺森冰室
詳情：人氣強就好味 坪洲祺森冰室
行咗咁耐，午餐就嚟到全坪洲最強人氣嘅排隊食店：祺森冰室。冰室嘅招牌菜係蝦多士，聽講蝦多士用薯蓉、洋蔥、蝦肉同豬肉做成，炸到金黃脆卜卜。不過，我哋今日嚟到，蝦多士唔係即叫即炸，反而係預先炸好，雖然仍算香脆，但就唔夠熱。另外，我哋一向認識嘅蝦多士都係加入蝦膠製成，但呢到嘅蝦多士只有半隻蝦，所以食嘅時候，有啲失望，亦欠缺口感。
第五站：秘密花園
詳情：工業風打卡秘景 坪洲秘密花園
前身為三級文化古蹟嘅牛皮廠，由藝術家收集島上居民廢物，再加入藝術元素，活化成一個以藝術為題嘅秘密花園，真係好有台灣文創園嘅感覺。當然花園內有唔少打卡位，好輕鬆就影到唔少A姐滿意嘅呃like相啦！
第六站：坪洲戲院
曾經香港電影業非常蓬勃，就連坪洲都設有戲院，坪洲戲院喺1978年開始為島上居民提供娛樂，至1987年結業，並荒廢至今。坪洲戲院雖然並未獲歷史評級，而戲院內亦有唔少鬼故事，但就成為咗廢墟攝影者嘅熱點。
第七站：手指山
坪洲最高點就係高95米嘅手指山，行上手指山嘅前半路段主要係石屎路，臨登頂前有大約300級樓梯，整體唔算難行。登頂後可以喺涼亭休息，望住無敵海景，遠眺數碼港、青馬大橋、迪士尼樂園及愉景灣等嘅景色。
第八站：A NOY 麵包舖
詳情：坪洲必食芝麻餅 A NOY 麵包舖
行完山，又點少得買啲嘢食醫吓肚呢？呢度有唔少港式麵包選擇，但最出名嘅就係南乳芝麻餅。南乳芝麻餅分為黑白芝麻同白芝麻兩款選擇。芝麻餅成塊面咁大，上面鋪滿大量芝麻，好足料！咬落鬆脆香口，加上淡淡嘅南乳味，確實滿足。我哋就覺得黑白芝麻嘅芝麻味較突出！
