【A&M Diary】去中國、台灣或泰國旅行嘅時候，總會參觀一下寺廟。有啲寺廟可能係城市嘅地標；有啲寺廟可能好有歷史價值；又有啲寺廟可能金碧輝煌富現代化，例如：南京牛首山、西安法門寺、無錫靈山梵宫等，真係成座宮殿咁！其實香港都有唔少寺廟，但俾人嘅感覺都係傳統同歷史十足嘅類型，好似係文武廟、天后廟等，相對現代化嘅，除咗大埔慈山寺、昂坪天壇大佛，仲有位於屯門藍地嘅妙法寺！
提提你
1. 佛門清靜地，大家記住保持安靜
2. 部份地方唔可以影相，大家記住留意指示
前往方法
1. 西鐵及輕鐵：乘坐西鐵至兆康站，轉乘輕鐵（610、614、615或751）至藍地站落車，步行約8分鐘就到達妙法寺
2. 九巴：53、68A、263M、63X於妙法寺巴士站落車
3. 自駕遊：妙法寺設有停車場，每小時$50起，如果唔嫌貴可以直接泊入去；或泊至附近屋苑停車場，如豫豐花園、綠怡居
妙法寺
1980年落成嘅舊翼，樓高三層。門嘅紅色外牆上盤旋住兩條巨型金龍、一頭石象同一對獅子，佢哋守衛著妙法寺入口。正門供奉嘅係彌勒佛，兩邊就有四大天王，喺3樓就係大雄寶殿，供奉三座釋迦牟尼金佛像，而牆上就有無數佛像。
蓮花大殿
喺舊翼2樓設有天橋連接新建嘅蓮花大殿，大樓以蓮花上寬下窄為設計概念，都幾似紅館嘅外型。呢座7層高嘅綜合大樓，集佛殿、圖書館、講堂、辦事處同停車場，喺2010年先落成。佛殿供奉一佛二菩薩二尊者，喺中央嘅釋迦牟尼像用柚木雕造，高8米，係全港最大嘅室內木雕佛像。喺釋迦牟尼像兩旁分別為舍利弗尊者像同目犍連尊者像。殿內兩側同頂部裝上大型玻璃，可以透入自然光線，除咗環保實用，更顯得佛寺與時並進。
