【A&M Diary】放假就梗係要去玩啦！加上就嚟情人節，所以M佬就帶我去到The Hari Hong Kong玩Staycation，The Hari Hong Kong以英倫為設計主題，無論酒店嘅硬件定軟件都令我哋留下深刻嘅印象。另外，酒店設有兩間餐廳，分別係日式餐廳Zoku同我哋今次嚟到嘅意大利餐廳Lucciola Restaurant & Bar。Lucciola餐廳設計充滿古典氣息，主廚Francesco Gava希望食客嚟到Lucciola，可以品嚐到多種帶有傳統風味同現代特色嘅意大利菜式。
食西餐又點少得麵包呢？喺落完order之後，店員就會奉上熱辣辣麵包，呢度提供3款選擇，有香脆亦有軟熟嘅選擇。
Il Carpaccio di Ricciola
落order嘅時候，店員推介我哋試吓呢個前菜。其實我初初對呢樣嘢係完全無概念，直到上枱嗰刻，見到紅卜卜咁，仲好擔心會好腥添，但原來真係無介紹錯，好好味呀！其實Il Carpaccio di Ricciola即係將油甘魚切成薄片，紅卜卜嘅其實係紅洋蔥同車厘茄醬汁。油甘魚好新鮮，切到薄薄一片，入口好滑，配埋個醬汁一齊嚟食，酸酸哋都幾開胃！紅洋蔥仲增加口感，唔錯！
Scampi al Forno Olio e Limone
另一款前菜，我哋選擇咗Scampi al Forno Olio e Limone。呢款蝦同平時食開嘅唔一樣，佢用嘅蝦係有鉗，然後將佢開邊，加入阿瑪菲檸檬同橄欖油烤焗而成。蝦本身夠新鮮，好鮮甜，仲有唔少蝦膏添！另外，因為蝦本身已開邊，食得夠方便之餘，仲入晒味添。
La Tagliata di Costata Di Manzo
主菜方面，我哋就叫咗肉眼扒。我一向都鍾意食三成熟，牛扒嫩滑，牛汁豐富，廚師仲預先將牛扒切開一件件，食得夠晒方便。配菜方面就有火箭菜同薯仔，火箭菜帶有牛汁，蓋過原有嘅苦澀味。
Filetto di Gallinella All’acqua Pazza
另一個主菜，就選擇咗海鮮，裡面有魚柳、青口同蜆。魚柳無骨，啖啖肉，外皮煎到好香口；青口同蜆嘅份量好多，雖然略嫌蜆比較細粒，但確實好鮮甜。重點就梗係海鮮味濃郁嘅湯汁啦，正！
