【A&M Diary】香港有唔少水塘，大部份都位於郊野公園內，想去影相打卡嘅，點都要花少少腳骨力，如果懶惰嘅你都想輕輕鬆鬆去水塘影相打卡？今個weekend好去處，不如就去黃泥涌水塘花園啦！
提提你
大家記住保持環境清潔，自己垃圾自己帶走，絕對唔可以破壞大自然環境
前往方法
1. 乘坐新巴/城巴6、41A、63、66或76，於黃泥涌水塘公園站落車，往陽明山莊方向行大概5分鐘就到
2. 坐的士可以直達水塘
黃泥涌水塘花園
當時興建黃泥涌水塘主因，原來係因為1894年香港發生鼠疫，希望透過水務設施以改善大眾衞生。黃泥涌水塘儲水量為2700萬加侖，水壩高50呎，長270呎，係全香港第三個水塘。
黃泥涌水塘位於香港島嘅中心，極具戰略價值，所以當時政府曾經興建大規模嘅防禦設施。但喺二戰期間，英軍同日軍就喺黃泥涌爆發激戰，最後日軍喺12月23日成功佔領黃泥涌水塘，斷絕港島嘅供水，最後英軍無奈投降。
