【A&M Diary】香港雖然唔大，但18區都各有特色名物，好似講起沙田嘅名物，又點少得沙田雞粥呢！但原來M佬從來都無食過，所以我哋今日揸住1064去到火炭，泊好車之後，就喺山尾街熟食市場隨意去咗呢間泰源大排檔。
生滾沙田雞粥
雞粥大大窩，最欣賞係粥底充滿雞香味，而且好綿滑，最重要係唔會有太多雞油同碎骨。
金牌燒乳鴿
乳鴿皮燒到好香脆，熱辣辣，加少少淮鹽，就更惹味。
豉椒炒蜆
order完一陣就上菜，速度之快令人難以置信，好在蜆無沙，尚算鮮甜。
西蘭花炒鮮魷
呢個西蘭花炒鮮魷嘅味道相對清淡，但勝在鑊氣足，加少少蝦醬或蠔油就得。
豉油皇炒麵
喺大排檔就最鍾意食豉油皇炒麵，貌似簡單，其實都好考功夫！炒麵夠鑊氣，條條麵都上晒色，配料有芝麻、豆芽同韮菜，加埋辣椒醬一齊食就錦上添花。
