【A&M Diary】唔知你仲記唔記得，細個嘅時候，去到茶樓飲茶，總會有啲推車仔嘅姨姨，大聲叫賣佢哋車仔上嘅點心。當推出一啲熱門嘅點心，好似係蝦餃、燒賣、馬拉糕（啲媽咪一定同姐姐講要邊）等，就會有好多人拎住點心卡衝埋去，呢一種味道叫「氣氛」！隨住時代嘅進步，大家都追求所謂嘅健康食物，又或者因為工序繁複，好多細個嘅美食，都漸漸離我哋而去，呢一種味道叫「懷舊」！當年有酒樓推出「即叫即蒸點心」之後，推車仔嘅姨姨就唔駛再推車仔喇。不過如果你想追求「氣氛」同「懷舊」，香港仲有一樣嘢叫「保留」，今日嚟到旺角嘅倫敦大酒樓，重拾推車仔點心嘅集體回憶。
牛仔骨
好多酒樓都唔推出牛仔骨，但呢度仍然搵到！牛仔骨份量超多，索晒黑椒汁，好惹味呀！
蝦餃
講真，你想食皮薄精瑩嘅蝦餃，絕對唔好嚟倫敦大酒樓，但呢度嘅蝦餃餡料豐富，鮮蝦彈牙，確實唔錯。
牛肚
牛肚夠腍，好入味。
雞札
雞札最正一定係舊火腿（唔知你認唔認同呢？）但呢度嘅雞札竟然無火腿，反而入面舊魚肚好大塊，好入味。
蒸土魷
蒸土魷喺酒樓都開始少見，難得見到，一於回味吓！土魷份量唔少，但唔知係未蒸咗好耐，土魷比較細塊，而墊底嘅係用陳皮魚蛋，不過，肉質比較削。
