【A&M Diary】今次嘅Staycation同A姐嚟到萬豪國際Marriott International旗下，位於西營盤嘅香港萬怡酒店Courtyard by Marriott Hong Kong。喺今次住宿嘅體驗當中，最難忘就當然係佢個海景同嗰張好舒服嘅床。另外，我哋嘅晚餐都選擇喺酒店內嘅MoMo Cafe，主題係意式放題。
汽泡酒
一坐低，店員就先送上汽泡酒welcome我哋，為今個晚餐打開序幕。
豪華海鮮拼盤
喺飲緊酒嘅時候，店員就送上豪華海鮮拼盤。拼盤夠晒豐富，有波士頓龍蝦、法國生蠔、長腳蟹、青口、蜆、翡翠螺同凍蝦，樣樣都好新鮮！我哋最鍾意嘅係生蠔，總共有4隻，好鮮甜，海水味濃。另外，波士頓龍蝦大大隻，預先開邊，食落夠晒方便，肉質新鮮彈牙，仲有好多膏，好滿足；蜆雖然唔算大隻，但超鮮甜呀！
留意番：汽泡酒同豪華海鮮拼盤都唔係無限order㗎，只係serve一次。
食完海鮮拼盤，可以去到自取區攞嘢食，或填點菜紙，order意式主菜。
自取區
自取區有芝士、沙律、凍火腿、沙樂美腸、麵包、湯同水果等。特別鍾意佢哋嘅預拌沙律，味道各有特色，而且選擇有成6款，食完仲會keep住轉款，真係好吸引㗎！至於今晚嘅湯，就係雪梨雪耳煲豬展，好滋潤，而西湯就係南瓜忌廉湯，配麵包真係一流。
意式主菜
主菜選擇有成16款，填完order紙，店員就會根據人數上餐，每次嘅份量都唔會好多，可以每款試完再根據個人喜好，無限encore！
菠菜意大利雲吞松露醬
A姐話16款選擇裡面，佢最鍾意就係菠菜意大利雲吞松露醬！菠菜香味濃郁，配上松露醬係好match，好creamy！
是日煎魚 + 意式烤鴨胸
呢個煎魚，油香十足，魚肉好香好滑呀！呢個鴨胸雖然肥咗啲，但肉味好香，好嫩滑。
