【Now新聞台】截至早上11點，1小時內《彭博》用戶關注度上升最多的港股，依次為太古地產、海底撈、吉利汽車、新世界發展及騰訊控股。
太地股價今早一度挫逾5%，低見22.75元，高盛噚日輕微上調太地目標價至25元，集團喺舊年年底完成出售太古城中心第一座物業權益，但股價一直未見轉強，係咪因為美國10年期債息升至1厘，令太地呢隻息口敏股下跌？
英皇證券銷售部副總裁林建華話，呢個係原因之一，另一個原因就係疫情比預期中難受控，本來疫苗消息利好太地股價，不過，近期市場擔心集團嘅商場業務復甦問題，令沽壓再現，但Anthony認為，太地現價係抵買。
