【Viu】由鄧永威監製、魯文傑執導、麥沛東、李芯駖@COLLAR、巢嘉倫、Dee何啟華@ERROR、陳湛文、王俊傑等主演嘅舞台劇 《你好，打刧！return》，噚晚首場公演！出品人劉德華於後台欣賞企足兩小時，投入到不時拍晒手，完場時更登場同演員們一齊謝幕，令觀眾好驚喜！
身為出品人及監製嘅華仔話，要喺後台負責調教大家嘅表現，「我有時直頭望住佢哋，睇下佢哋做成點！我都好少喺呢個角度睇佢哋，都幾鍾意。我又無諗過你哋會做得咁好！ 」阿Dee聽到呢番讚美，即受寵若驚咁講：「仲有19場，依家壓力好大呀！」噚晚亦係座上客嘅黃德斌就大讚好好睇，話係出乎意料之外！佢亦大讚阿Dee表現好：「劫匪嗰種冷靜，真係我都未見過！劇本好好，令到每一個演員可以有好多唔同嘅表現！可以係好反覆，好多變化！睇到佢哋有好出色嘅表現，唔簡單！」華仔聽完接住話：「德斌講得，就得！」
阿Dee指未試過2小時喺舞台直落演出，人有三急都要忍，對佢係一個能耐挑戰，佢鬼馬話我出台前要好似扭毛巾咁扭！佢亦即時向前輩德斌請教，德斌即笑指：「靠個人本能啦！」德斌又驚喜發現陳湛文原來係動作演員呢！至於麥沛東就為角色再花心思苦練口琴， 「經過前兩次演出，我覺得自己下半場無咩點講嘢，咁點解呢？我同監製、導演謂我有一個新諗法，但我唔識、我要學，我就去學吹口琴。」華仔搞笑提議佢下次準備鋼琴！
第一次加入團隊嘅王俊傑坦言：「大家好錫我，會偷偷地搵位糟質我，令到我有突發要去應對！當然係台上借啲位拍我一下，用唔同嘅方法畀我進入角色。」 更獲華仔送上鼓勵，「三場之後，你會發現你哋六個人又進入咗另外一個階段，慢慢慢慢你哋就會察覺得到！信自己，你哋得㗎！兩個德（劉德華、黃德斌）話畀你聽就得！」而首任導演嘅魯文傑話絕對有戲癮，同時指陳湛文已經超越咗佢，點名話想同對方合作擦出火花！睇片喇！
