【Viu】Renci楊偲泳、小野盧鎮業、Rachel梁雍婷、張紋嘉及彭秀慧等今晚出席新片《廚師發辦》首映！
小野透露為咗呢齣電影特登去學唔同菜式嘅基本刀功，同埋最難嘅手握壽司，壽司師傅做咗10年都仲學緊，佢自言學得嗰一兩日有少少驚，好彩喺鏡頭幫助下效果唔錯！但佢唔打算整壽司俾女友廖子妤試啦，但就話平時都有煮吓飯嘅，都算sweet啦！小野仲話因為宣傳要去唔同地方煮返戲中嘅菜式，而角色最重要一道菜係豆腐肉碎蒸蛋，佢已識整添！
因為劇情涉及Dating App話題，小野坦言細時試過上網識朋友，好似icq或者online game咁，近年就冇啦，不過佢都肯自爆細時喺啲game入面玩結婚，識到個澳門女仔，之喺icq傾偈，但就冇見面嘅，都算霧水情緣喎！Rachel就講笑話都老啦，冇用Dating App啦，都係細個玩MSN同論壇！Renci直程驚詐騙所以冇用，Rachel就話好彩身邊冇朋友遇到詐騙，但係有朋友透過Dating App識到另一半結婚生仔喎！
Renci最近忙為三齣電影謝票，除咗呢齣《廚師發辦》，仲有《浪花男女》同埋未落畫嘅《UFO離奇命案》，搞到有網友改圖讚佢可以同時分身都幾犀利，佢話都有見到，覺得人生好難有第二次呢啲機會，多謝大家肯入場支持港產片，不過佢唔覺得係自己打自己，希望大家抓緊暑假嘅尾巴，所有港產片都睇就最好啦！而家睇左足本訪問先啦！
