【Viu】Anson Lo盧瀚霆一連兩晚喺澳門舉行嘅《KINGDOM》巡迴演唱會已圓滿結束，相隔半年再次化身「埃及教主」，佢今次真係落足心機，連「教父」同「教母」都專登過大海撐場！撈撈著住嗰件鑲咗13萬顆水晶、重逾30磅嘅華麗戰衣跳唱《ON》同《Heartbreaker》，今次仲加埋煙花效果，閃爆呀！不過佢就話自己比香港站時瘦咗，搞到啲戰衣全部要改窄，仲鬼馬咁笑住解釋點解成日要抽褲頭，全因為太瘦囉！
跳唱完一輪快歌之後，香汗淋漓嘅撈撈就開始澳門限定情歌環節，首唱新歌《最後一個降落傘》，仲形容呢個深情時段就好似「教主同神徒有一個約會」咁甜。到唱《你都有今日》嗰陣，佢仲登上埋小飛船上山頂位親近遠方嘅神徒BB。全晚最火辣嘅就一定係佢唱《Rude Boy》嗰陣，紅彤彤咁騷出刻苦操肌成果，零贅肉之餘仲同女Dancer大跳貼身舞。之後佢又戲精上身，扮神徒怕醜同熱情嘅表情，又模仿Fans High爆揈頭跳《Mr. Stranger》嘅樣，笑C。
encore環節，Anson Lo就同神徒們深情告白，佢表示開騒前其實發緊燒，綵排時狀態差到覺得件舞衣好沉重，但正式嗰陣一見到全場神徒，件衫即刻變輕晒，仲冧爆話：「分別唔在於衣服輕重，分別在於神徒們係咪在場！」之後佢越講越感觸，坦言過去一個月因為節食戒口同密集訓練，搞到情緒低落、信心動搖，練唱嗰陣屢遇挫折，陷入自我懷疑。佢哽咽話：「我最驚嘅唔係自己受傷，而係會令你哋失望，怕你哋冇面目話俾人聽你係Anson Lo盧瀚霆嘅粉絲，怕你哋追我會被欺負、會唔夠膽繼續追落去……」全場神徒即時大叫「唔會」，教主忍唔住眼濕濕，仲笑住怪責大家整喊佢。
去到二度encore，Anson Lo換上「銀灰戰士」造型唱出《Charisma》同《Take That》，佢邊唱邊拉高件外套，全場尖叫聲震爆場館！完騷後佢仲特登到場館外同神徒近距離good bye，逐個角落走去同大家自拍，認真寵粉！
