【Viu】MIRROR嘅姜濤、Anson Lo盧瀚霆、呂爵安同Jer柳應廷，仲有許志安、馮德倫、Stephy鄧麗欣、衛蘭、24味、台灣唱作歌手蕭秉治及日本歌手jo0ji等，呢晚喺亞博演出《第八屆KKBOX香港風雲榜－ Music Reborn》，當中唔少crossover都有驚喜！而是夜現場投票嘅「年度風雲大賞」就由姜濤與Anson Lo一同獲得！
衛蘭孖樂隊晚安莉莉合唱Punk Rock 版嘅《驗傷》，日本藝人jo0ji獻唱《よあけのうた - Yoake no uta》亦獲得全場掌聲！Anson Lo同黃淑蔓合唱BLACKPINK 成員ROSÉ嘅《toxic till the end》，好有型！佢後來都同老best隊友Jer合唱《MY LIFE》，火花十足呀！
姜濤就同台灣唱作歌手蕭秉治合唱《毒藥》，呢個組合令人耳目一新，唱完後姜濤話之前特登問AI可以點稱呼蕭秉治，AI建議可以叫廷廷哥，所以佢問蕭秉治點解有呢個名，蕭解釋佢之前組樂團時叫蕭宇廷，所以叫廷廷，雖然姜濤話過今年唔出歌，但佢都冇停下腳步四圍搵啲好嘅音樂人寫歌，仲即席邀請蕭秉治寫歌俾佢，聽見對方答應，就話實會追佢，然後就tag落二人要合唱嘅《追》，真鬼馬！
鄧麗欣同Edan繼年初喺Chill Club頒獎禮合作後，呢晚加埋Jer三人唱咗首《戲一場》，正呀！後來Jer又同許志安合唱《星河感覺》同《人類群星閃耀時》，佢呢晚可以分別同兩位前輩合作，真係fat fat啦！而好耐冇唱live音樂會嘅馮德倫第一次同24味唱《You Can’t Stop Me》，陳子聰都有現身，面色好狀態勇，唱歌超勁又夠Rock！快啲睇實況片啦！
