【Viu】廖啟智遺孀陳敏兒本月12日因病離世，終年66歲，安息禮今日喺尖沙咀聖安德烈堂舉行，同當年智叔嘅安息禮選址一樣。禮堂中央擺放三個心形花牌，分別敏兒姐母親、大仔廖文哲同二仔廖文信敬輓；遺照選用敏兒姐面露慈祥微笑嘅照片；禮堂外則擺放咗敏兒姐身穿畢業袍嘅相，寓意佢「畢業」喇！禮堂內播放敏兒姐生前嘅照片，包括同智叔、兩名兒子嘅全家福；記念冊封底就印上敏兒姐嘅座右銘「五道人生」，包括道謝、道愛、道歉、道諒同道別。
雖然家屬事前表明懇辭花籃，但教堂外仍有周潤發夫婦、劉德華、蔡少芬張晉夫婦，以及藝進同學會等送上嘅花籃。而杜琪峯、胡楓、鄧萃雯、賈思樂、廖安麗、劉江、鄧英敏等專誠到場送別陳敏兒。文哲同文信喺下午3點半左右捧住亡母遺照步出禮堂，文哲難掩傷感，雙眼通紅；文信嘅情緒相對平靜，兩子其後陪同母親嘅靈柩登上靈車離開。
同敏兒姐相識多年嘅鄧萃雯受訪時，講到最遺憾係見唔到敏兒最後一面，一度哽咽，仲話對上一次見面已經係2023年，期間一直透過謝寧關心敏兒嘅情況，亦好難忘當年敏兒好學，經常係唔同嘅課堂同佢碰面。
