【Viu】啱啱過咗「18對」生日嘅吳業坤憑《愛情求生案內書》獲港台「十大中文金曲」，佢受訪宣布喺音樂方面回復自由身，抵死笑言要開返個OnlyFans account向一眾金主爸爸媽媽賣腳趾眾籌喎！下一步係咪開個人工作室？
之後坤哥又透露新鮮滾熱辣投資咗6位數字落新歌度，而舊歌方面嘅版權就處理中，是咪諗住開騷賺錢？笑問咁係咪暫時唔決定生B，開源節流嗰陣，點知突然brainstorm到佢即場度咗條絕世好橋出嚟，就係飛老婆鄉下做「袋代購」賺錢，咁要做埋model影product相喎，到時堅係拋個身出嚟做？呢件事真係少少鹹多多趣啦！
Gin Lee繼續喺頒獎禮上獨領風騷，獨擸4獎勁fat fat之餘，仲係三度冧莊女歌手獎！不過Gin話最surprise係憑大碟《Leap of Faith》獲女歌手「最佳中文唱片獎」，順勢預告演唱會嘅Blu-Ray會趕喺5月面世兼會有新歌！
另外，最近兩位老best周殷廷、JACE喺新合唱歌嘅宣傳上引起風波令網民不滿，嚟緊Gin喺宣傳新歌上會更謹慎？講到Gin都有喺周殷廷個post度留言「恭喜」，佢都係受騙之一？定佢一早知情？Gin又覺得呢個宣傳手法如何？而原定周殷廷完騷後會同Gin一齊受訪，但去到訪問環節就唔見蹤影，大會表示周殷廷因嚴重鼻敏感要先行離開；至於林家謙則因為趕住返屋企餵狗而未有受訪，透過大會表示「好對唔住大家」！點都好，依家先睇足本訪問！
