【Viu】周潤發、唐詩詠、方力申、吳業坤、Mandy譚旻萱、霍啟剛同太太郭晶晶等，今朝冒雨挑戰《機場·渣馬︰三跑道系統十公里國際賽》。發哥表示今次唔係追求時間，反而係欣賞三跑嘅風景，仲笑言將來有「四跑」一定報名，又「點燈」詩詠參加2026年嘅渣馬半馬項目，但詩詠就自覺能力未達標喇！笑問榮升老闆娘嘅詩詠，有冇帶自家麵包嚟「進貢」發哥？發哥就話開舖第一日已經幫襯咗，仲大讚詩詠好甜，係咪好想知點解呢？
講到早前喺活動上同韓星G-Dragon再見面，發哥就開心Share同GD傾啲乜？仲話如果有邀約，唔排除去韓國會影迷咁話！至於被網友發現影發嫂大頭相，「Selfie之帝」發哥自認老貓燒鬚喇，好彩老婆夠靚，點影都靚啫，嘩！好閃呀！雖然發哥自嘲冇嘢撈，但一直都支持香港電影，仲買咗飛睇一套戲噃！
期間坤哥見到神級偶像發哥即小碎步上前集郵，最開心係發哥認得自己，仲知道佢有老婆，呢單嘢真係要寫落CV喇！
此外，前日生日嘅Mandy直言為咗比賽有就住玩、就住食，雖然今次見唔到發哥，希望努力練習可以追得上偶像嘅步伐咁話！
