【Viu】陳蕾日前完成一連4場嘅《完整的我》音樂會2026，每場演出都戴住黑超、拎住波板糖chok爆登場，一嚟就唱《拖延症》打開序幕，配合舞台啲雷射、燈光effect成個vibe都正到暈呀！
眼見台下有男fans嚟支持，蕾子得戚自嘲話男fans絕對唔係貪圖佢嘅美色，而係真心撐佢嘅音樂：「我扮完『超大巨人』之後你哋都仲係度，係真愛，多謝你哋！」佢又勁識撈咁用渣男語錄嚟「調戲」埋女fans：「我嘅女歌迷係愛我嘅全部！」蕾子幾時變到壞過凱婷架？
去到音樂會中段，蕾子接連唱《以正義之名》、《下流社會》，fans嘅歌聲幾乎蓋過蕾子本人，氣氛瞬間推至最高潮！至於喺唱《五瓣玫瑰》嘅時候，蕾子對fans有求必應，又包剪揼、派心心放題，仲擺出港女五式手勢滿足每位fans！
蕾子除咗唱盡新碟《凝》嘅全部作品外，又首唱入圍本屆金像獎「原創電影歌曲」嘅電影《女孩不平凡》主題曲《普通人》！佢喺第三場更清唱埋《完整的我》嘅Demo《龍蝦》，而喺尾場仲嚟咗個終極encore，唔止揀唱《娛樂人生》，蕾子見有fans舉牌寫《發燒》，就即興清唱呢首早期啱啱成為歌手嘅作品，勁寵粉！
騷後蕾子難掩興奮表示勁鍾意唱Live House，細場嘅優勢可以同fans有近距離接觸，一見台下fans咁high，就會激發到佢唱得更落力！佢透露之後要努力準備一個關於針織嘅工作，所以會投入返「織女」呢個角色，同時都要為金像獎嘅演出做準備，戰衣方面同公司已有共識，主要會配合電影同主題曲嘅方向！
