【Viu】華納「三寶」陳蕾、Kaho洪嘉豪、MC張天賦孖Moon Tang喺今晚華納Family show後受訪，心情keep住high！先講到喺個騷晒舞技，4位沾沾話一次比一次跳得好，唔知咩叫「甩step」咁話，講講吓MC、Kaho更即場挑戰跳女子組嘅《886》添！Kaho仲話堅係有邀請薛凱琪嚟睇騷㗎，唔知女神有冇現身呢？
Moon Tang喺騷入面有Part係同舊愛Gareth.T crossover，由Gareth.T鋼琴伴奏唱《Honest》，呢個idea係邊個諗出嚟？分手後合作會唔會尷尬？至於MC早前被爆有新戀情，對象疑係擁有火辣身材嘅KOL Cherry，MC大方首回應冇拍拖，對方亦唔係KOL，再講埋所謂流出嘅疑似抱抱合照，只係角度問題啫，最後仲補一句如果有女朋友一定同大家講！
金像獎日前公布入圍名單，蕾子、MC分別入圍「最佳原創電影歌曲」，佢哋收到好消息時係咩心情？蕾子話入圍嗰啲全部都係好朋友，除咗鄭伊健之外，聽到有MC份係有份安全感！MC仲諗定想同3位影帝集郵，究竟係邊3位？Kaho亦曾入圍金像獎同一獎項，呢位「師兄」有咩tips要畀蕾子同MC？MC個操弗大計又進展成點呢？
是日亦係Nancy Kwai嘅正日生日，問到壽星女有咩生日願望？點知講出嚟令全場笑爆嘴！Nancy話雖然生日要開工，但可以同咁多人一齊過係好開心嘅，特別係可以同女子組一齊跳《886》！不過數數手指，點解Dear Jane冇份跳？難道四子有特權？如果之後組女團行跳唱路線，Kiri T又肯唔肯？
另外，Dear Jane宣布5月會開20周年紅館騷，暫定4場，透露騷前會再出多兩首新歌！至於講到有咩surprise，四子突然大暴走，由Howie領軍嗌跳火圈、跳舞、甚至乜都除，個尺度仲係除淨對襪，嘩！呢單嘢堅定流先？Jackal接力話要拎埋支「水喉」出嚟，玩到咁大，Tim、Nice會唔會跟隊先？欲知後事如何，就要睇足本訪問啦！
