【Viu】由翁子光執導、金燕玲、Edan呂爵安、鍾雪瑩、李尚正同「蝦頭」楊詩敏主演嘅賀歲片今晚舉行首映禮，Edan同鍾雪首次同金燕玲合作，大讚前輩好Nice，鍾雪仲話可以同金姐姐拍唱K場口係成就解鎖，又笑言有諗起當年Hit爆社交網絡嘅專頁「金燕玲每天被不同歌曲傷害」，但Edan就話冇聽過呢個Page喇！Edan話其實自己都有模仿張學友唱歌，唔知正片有冇收錄，如果冇就提醒大家等彩蛋啦！
要有彩蛋當然要為票房立Flag，Edan揚言要睇齊正爺，如果票房收3億就著泳褲謝票，不過係講緊3億美金喎，仲好開心可以唱到由鍾雪同正爺首次攜手填詞嘅電影主題曲添！
至於正爺就獲「蝦頭」楊詩敏同「妹頭」盧頌恩兩美相伴，搞到佢都唔知揀邊個好，仲話「兩頭」好似樣，自己拍拍吓都會叫錯名。蝦頭就大爆正爺被自己嘅美色迷惑，主動加咀戲，嚇到自己推開佢呀；妹頭聞言即話唔會呷醋，好大方喎！
