【Viu】數到呢期最紅、最Dope嘅必定係廿四味Brian，憑住有嗰句講嗰句嘅直率風格極圈粉呀！今日佢受邀現身新車發布會，笑話冇諗過上網台啲片有咁大迴響，因為識佢嘅人不嬲都知佢係咁講嘢，搞笑高呼：「終於feel到我啦！」
Brian預告遲吓會搞飲食channel，會用着幾多條褲嚟當評分，萬一係唔好食嘅話就會show「大笨象」，係有啲諗頭㗎喎！但淨係一支公去食咪唔夠dope？所以Brian話會搵嘉賓一齊jap，必定預埋廿四味班bro，咁唔知會唔會搵老闆古天樂？又或者搵埋《尋秦記》一齊慶功？
人逢喜事精神爽，Brian呢期唔只爆紅，滑板店新開地舖、Barber Shop又就嚟開第9間分店，百足咁多爪！下一步會唔會就係開餐廳？Brian講到私下有同Marf交流飲食經，有去Marf推薦嘅食店，正到着多多條褲都搞唔掂，「人質」放監咁款！
另外，Brian興奮話最近學識寫「新年快樂」，依家個database唔止係「蝴蝶」、「銅鑼灣」，咁可以起到好多層樓喎，就連阿囡都有讚佢進步神速！唔少網民都叫佢寫揮春、擺年宵，Brian會唔會順應民意？不過佢堅係透露遲吓會出一件tee，上面印有佢手寫「蝴蝶」、「銅鑼灣」，有冇驅鬼功能先？即刻click入嚟睇足本訪問，Brian話過你知！
