【Viu】啱啱過94歲生日嘅「修哥」胡楓，今晚西裝骨骨現身晚宴，賀「保險女王」Agassi王玉環創下世界紀錄，獲認證為「保險業晉升至最高職位的女歌星」！問到壽星仔修修生日願望，佢就話梗係身體健康啦！
講起日前出席另一晚宴突變生日party，獲「雙華仔」劉德華、黃日華等陪切蛋糕，修修話好surprise呀，咁大個仔都未試過喺咁大場面過生日！席上仲有周潤發添，修修話知發哥同埋劉江、鮑起靜、鄭則仕一齊跑馬拉松，值得鼓掌！唔知修修有冇興趣join埋？佢透露嚟緊會宣布開紅館騷，講到明契仔張家輝一定要上台，咁會唔會搵埋張學友先？
Louie賈思樂下月中就開騷，佢話自上月開完記招後就留港準備，見佢近日孖黃日華宣傳個唱，莫非華哥堅係做嘉賓？Louie預告開騷後會stay埋過農曆新年，話事隔3年幾留港過年寧舍期待！提起Louie曾受訪自爆喺美國入院割膽石，佢形容經歷咗女人生BB嘅十級痛感覺！
主人家Agassi同老公秦毅恩愛現身，表示從事保險業已經有31年，好開心破到世界紀錄，更揚言永不退休！唔知呢位昔日「鬼后」有冇戲癮？會唔會想出山客串下？而呢晚圈中半百藝人到賀，除咗修哥同Louie，仲有劉培基、周美鳳、羅霖、謝寧、張文慈、陳綺明、杜德偉同太太李曉冰、郭秀雲、鍾慧冰、薛芷倫、文雪兒同夏文汐等，星光熠熠呀！
