【Viu】由Tiger同Lokman粉絲應援會前晚搞咗個《存酒人》結局放映會，除咗Lokman因工作在身未能出席，Tiger聯同監製簡君晉、導演盧麒麟、編劇彭志海，以及朱栢謙、Asha徐㴓喬同埋安柔潔等都現身戲院，更驚喜嘅係，劇中飾演燁仔爸爸嘅黃又南，同埋神秘角色Elaine嘅張新悅突然出場，完全係「無預警彩蛋」，即惹嚟全場歡呼聲！
睇完劇後，演員們同幕後團隊仲即場同觀眾交流，分享拍攝心路歷程同幕後趣事。首次擔正做劇集男主角嘅Tiger就感性表示，可以遇上一個咁出色又齊心嘅團隊，真係好幸運，佢仲分享幾場難忘戲份，包括人生第一次熒幕初吻，最「殘忍」嘅係，錫錫完唔夠三個鐘，就要拍分手戲，情緒極速轉換，連安柔潔都忍唔住話成件事「好刺激」，Tiger就苦笑形容：「幾殘忍！」
講到Lokman飾演嘅阿當離世後嘅悲傷情緒戲，Tiger話曾向朱栢謙請教，學習用「諗返快樂畫面」去演繹悲傷，仲喺同Lokman現實中嘅相處點滴攞靈感，將真感情注入角色。另一場令佢特別深刻嘅戲，就係喺台灣街頭買醉嗰幕，原來Lokman拍完自己戲份後特登留低陪佢入情緒，令Tiger到而家諗起都仲好感動。Asha就笑指最難忘係醫院嗰場戲，親眼見證Tiger同Lokman兄弟情深，仲爆料話Tiger真係有出力摑Lokman，聽到全場嘩聲四起！
監製簡君晉亦大爆幕後秘聞，原來市井酒吧原本打算借用真實酒吧作主場景，但最後都由美術組出手，搭建一個專屬嘅市井酒吧。至於首次執導電視劇嘅導演盧麒麟亦坦言，劇集播完後萬分不捨，希望將來有機會以音樂會、電影或者前傳等唔同形式延續市井酒吧嘅故事！
