【Viu】杜德偉嘅巡唱喺10月就會唱到返嚟香港，佢今日進行綵排時受訪，預告特別為咗香港安排一part歌舞係全部都唱廣東歌嘅，睇怕到時會焫㷫全場，為此要特別操練，唔只係回饋歌迷，亦係因為佢入行四十周年，本身有好多廣東歌一路都好想唱咁話！
Alex之前喺台灣場就以特效做就佢同已故爸爸及囝囝AJ三代同堂咁演出，佢話家陣AJ升咗班，功課忙，如果要邀請阿仔做嘉賓，首先要同太太攞期嚟排練，不過因為阿仔好享受上台，上次表演完都有問幾時有下次，所以Alex都好期待可以成事！
Alex仲透露今次個唱會有嘉賓，但人選要保持神秘，不過可以透露嘅係對方靚仔同後生過自己、識唱歌跳舞，仲係台灣飛過嚟，同自己係多年好朋友喎，咁多hints大家估唔估到？搞今次個唱令Alex知道好多朋友鍚自己，之前已有好多圈中朋友拍片支持，令佢驚喜又感動，希望佢哋個個都會嚟捧場！
講到好友張學友最近巡唱不時生病影響演出，Alex話雙方一直有聯絡，佢亦有第一時間問候學友，仲話學友係一個好正面好有能量嘅人，知道佢應該冇問題！至於有份參與嘅電影《風林火山》好快上映，ALex話估唔到等到自己開騷先至上，好期待睇到自己嘅演出，希望大家睇完話佢知做得好唔好啦，快啲睇足本訪問啦！
