【Viu】陳慧琳10場紅館個唱喺噚晚演出到第6場， Kelly同嘉賓AGA江海迦首度現場演繹全新合作歌《The Lost Sunglasses》，好有驚喜！
唱歌之前，AGA分享：「作為女性有陣時都擔當好多嘅角色，可能係人哋嘅老婆、媽媽、女兒，又有自己事業，真係一啲都唔易，而我覺得Kelly做得非常之出色！」Kelly就搞笑透露AGA嘅創作靈感：「唱之前我哋攞個道具出嚟先，因為係AGA去英國旅行唔見咗副sunglasses，跟住就作咗俾我，唔見咗嘢就諗到首歌出嚟，好鬼勁！」 兩個人之後齊齊戴住黑超，Kelly問AGA搵返副太陽眼鏡未，AGA回應話：「今晚搵返喇！」
Kelly今次紅館騷舞台可以用「巨」 字去形容，除咗有4層樓高大屏幕、 開場嘅黑色飛馬之外，佢喺唱《最佳位置》時會企上可延伸升降天橋 ，又同粉絲大合唱，畫面好靚！仲有，即時充氣至大約5米高嘅小黑咪陪住Kelly唱出《超級小黑咪》，見到真係啲童真都返晒嚟啊！
