【Viu】方俊、關禮傑今日齊齊現身健康展，驚見方俊起碼瘦咗2個size，佢承認最近2、3個月瘦咗20磅，就連身邊嘅朋友都擔心佢，但方俊就派定心丸話身體冇事，只係因為「雙重照顧者」身份，同時照顧媽咪、師父張偉文，太奔波導致減磅！
講到師父最新情況，方俊報喜指師父冇再發燒，壓瘡方面亦成功控制到炎症，傷口開始生返粉紅色嘅肉，每日定時清洗傷口、保持乾爽則能避免細菌入血，雖然距離好返晒都仲要畀啲時間，但已經有一個好大嘅進展！
正因為張偉文傷口嘅痛楚大減，胃口開始增加，精神都好咗好多，最令方俊感動嘅係聽到師父食完佢煮嘅嘢食之後話：「好食！」坦言有呢句就乜都值得，佢又抵死笑話依家要同師父一齊增肥！問到方俊嘅皮草生意，佢話盡力而為守業，唔蝕就心滿意足！
關禮傑同老友張兆輝近日又post咗合唱片，私下老友鬼鬼嘅二人成日約飯局，有網民見到佢哋呢個訓練班組合，就諗起同期仲有周星馳、梁朝偉，不過關禮傑就話冇同星爺、朝偉約聚會，甚至連同期大型re-u都冇試過，所以講起都有啲遺憾呀！另外，關禮傑開心share凍齡tips，謙虛話係跟張兆輝學嘢，佢哋兩個咁friend，查實有冇諗過要對親家？嚟近父親節又有咩節目？想知就要睇訪問啦！
