【Viu】1月21號就係Edan呂爵安嘅28歲牛一，噚日佢獲海外後援會聯合搞咗個生日會應援，舉行咗兩場「Stars Light Up the Edanverse」Party，爵屎們更請嚟「正印」小儀做MC，巧有心！Edan同爵屎大玩遊戲、切蛋糕，海外後援會仲預備個驚喜，集合咗香港同埋海外嘅爵屎祝福影片，令壽星仔勁感動！今年成為唱作歌手嘅Edan，又獲贈家用專業錄音咪，爵屎希望佢可以創作更加多好嘅作品。寵粉嘅Edan即席開IG live，俾無法出席嘅香港與海外爵屎一齊參與其中。
席間，壽星仔又向爵屎真情剖白，感慨指27歲嘅自己經歷咗好特別嘅一年，「自己多咗好多唔同嘅經歷，有好多唔同嘅感受，大家見到有啲事情，大家見唔到嘅，我都發生好多唔同嘅事情，的確有好多以往未體驗過嘅感覺，或者有好多唔同嘅情緒。個天係咪玩我？Keep住發生好多控制唔到，匪夷所思嘅事。」佢笑指可能俾人落降頭，「我都有懷疑過，身邊嘅朋友話你呢排風水真係好差，真係搲晒頭，點啊？各方面一路發生好多事情。」佢續指27歲對自己嚟講係轉變嘅一年，認清更多嘢嘅一年，「以往嘅自己可能有啲天真同幼稚，唔夠成熟，有啲嘢可能諗得太簡單，呢一年係有機會審視自己嘅不足，我形容為有一種變化嘅感覺，可能28歲嘅Edan會係新嘅出發或者轉變。」Edan又多謝爵屎們一路以嚟都比力量、勇氣同埋動力佢，希望繼續同大家一齊去探險、探索！
最後，Edan繞場一周同爵屎們近距離接觸，一齊大合唱《My Apple Pie》，現場充滿住濃濃嘅愛！小編都預祝Edan生日快樂！
