【Viu】Jay馮允謙、陳蕾、談善言同YoYo謝咏欣今日喺金鐘出席活動，Jay仲有一個月就會舉行紅館演唱會，而家正積極排練，講到跳舞，Jay嘆一口氣，話之前得教主讚「你跳得好好睇」，信心已增加，但仍需努力。問到會唔會邀請欣宜睇show？Jay透露二人已經有一年冇見面，但對方有主動私訊同佢講加油，只要對方想嚟睇show隨時都歡迎。
剛同岑寧兒去完日本充電嘅豹哥，年底會同洪嘉豪、Jeffrey合作開騷，豹哥透露影poster當日，已頂唔順兩個幼稚男人嘅對話，令佢經常反白眼。而「華納舞王」嘉豪可能會成為跳舞擔當，但唔會要求Jeffrey加操練舞，笑言自己天份都唔高。提到早前做嘉豪網上節目嘉賓，去英國「開一日拖」，直言對對方加咗品味分，聽到嘉豪真誠對話，亦希望兩人能在舞台上好好喊一場。
另外，談善言同YoYo均表示期待睇吳慷仁、柯煒林主演新戲《破浪男女》突破「性」演出，當中吳慷仁仲全裸添，年僅22歲嘅YoYo自爆未試過入場睇情慾三級片，表示拍《但願人長久》時，好彩呢部電影未上映，如果唔係就會鍾意咗「爸爸」，講嘅時候紅都面曬話吳慷仁係好吸引嘅「危險男人」。而阿談則透露正拍攝新劇，跟「撞樣」Tiger會有唔少對手戲，咁豐富內容記得唔好錯過足本訪問。
