【Viu】Sammi鄭秀文噚晚演出第10場《You & Mi 鄭秀文世界巡迴演唱會2023》（Rescheduled ），呢晚嘉賓係Jer@MIRROR，Sammi介紹佢出場時話：「今晚呢位嘉賓，新與唔新之間，都算新，出道咗幾年，佢嘅唱功毋庸置疑，非常之好。幾位嘉賓不約而同都要同我合唱呢首歌，唔知點解呢？」然後音樂響起《不要驚動愛情》，全場大合唱，Jer升上台同Sammi擁抱後拖手合唱，好溫馨呀。
MIRROR喺2019年初出道時曾經全隊擔任Sammi紅館個唱嘉賓，噚晚Sammi同Jer話當年，Jer話覺得今次同之前感覺好唔同，「上次12個人，成班傻更更，有班兄弟喺身邊陪住，今次得自己一個人特別緊張。今日綵排同老師練咗好耐。」Jer準備咗小禮物，自製迷你盲盒扭蛋機俾Sammi：「配合返你早前出新歌《盲盒》，特登整咗個『愉快盲盒扭蛋機』，裏面有啲關於我嘅小禮物，人型公仔啦，扭蛋裏面仲有啲神秘嘢，例如字條、祝福語、零食、糖果。」Sammi開心話有零食就夠，Jer話：「其實我原本想整薯片包，畀COLLAR整咗呀！」佢又喺褲袋抽出小扭蛋，Sammi笑言：「好似求婚咁，要送我首飾？嫁畀我啦！」Jer當然唔敢，佢掏出一個小公仔，原來係Baby MIRROR的Jer公仔，Sammi笑話：「蝦我老花，好Cute，大過粒鼻屎！」全場爆笑。Sammi落台後，Jer獨唱新歌《約齊靈魂在墳墓前開生日派對》。是夜捧場嘉賓有車婉婉同囝囝、吳雨霏同區文詩、岑寧兒、陳詠謙同MC Jin等。
