【Viu】張學友一共24場《張學友60+巡迴演唱會香港站》昨晚（13日）完美落幕，「撞樣細佬」張家輝、宣萱同導演劉偉強都有嚟睇騷。
學友落力獻唱，每場都有表演一字馬，唔靠「賣樣」，用行動話畀大家聽「60+」都可以好勁，完全冇諗過退休，因為一直做緊自己鍾意嘅嘢，就係唱歌，並自爆喺屋企練歌嘅趣事添。而學友逐一介紹團隊樂手時，當中有一位2002年出世、吹色士風嘅「小老師」，學友透露對方年紀比自己個女仲要細兩年，走廊相遇依然會向「老師」鞠躬，笑言：「係唔係幾順架嘞，但學無前後，冇得講！」
學友每次開騷除咗喺聽覺滿足大家之外，喺視覺上同樣做足100分！當學友唱《等你等到我心痛》嗰陣，背後巨型LED螢幕播出一段感人嘅音樂電影，正正係學友同老友舒淇嘅「十年之約」！故事講述學友同舒淇婚後有一子，但小朋友同學友相繼離去，留下舒淇一人，一家三口只能以靈魂方式「團聚」，最後彩蛋就係金燕玲驚喜出場，飾演老去嘅舒淇！
另一個螢幕焦點，就係落喺學友唱《又十年》嗰陣，以AI呈現出學友逐漸變老，滿面皺紋、鬍鬚斑白嘅容貌，最後化成一隻蝴蝶。去到個唱尾聲，學友真情剖白點解咁多年開騷都唔遞咪，最後仲出題考fans接唱玩遞咪遊戲，加碼大合唱《每天愛你多一些》、《還是覺得你最好》等，想知有幾好聽，就要入嚟睇片嘞！
