【Viu】「樂壇轉數王」張敬軒今日出席品牌活動，獲大批「澱粉」撐場，仲同幸運Fans同框合照兼送禮，氣氛High爆，難怪軒公笑認今日似「盂蘭盛會」啦，笑Cry呀！
軒公自認鍾意露營，除咗試過喺巴黎瞓公園，仲大講同Jeffrey、洪嘉豪同白只露營嘅趣事，踢爆Jeffrey嘅「煩膠實錄」，相信曾受到Jeffrey講經「蹂躪」嘅Tyson都好有同感！
唱得又Talk得嘅軒公，仲預告個人頻道會拍旅遊節目，最想「折磨」老友王菀之，又話想約林家謙齊齊露營食露營腸。咦，盛傳佢哋11月一齊開拉闊音樂會㗎嘛，不如喺台上食啦？軒公就陰陰嘴笑談同家謙嘅「露營腸發達大計」，想笑餐飽記得睇足本訪問喇！
