為達至最佳瀏覽效果，請更新至最新的瀏覽器版本。
如有問題，歡迎電郵至 pccwmediaiapps@pccw.com 查詢。
【Now.com】馮允謙 (Jay Fung) 日前拍攝新歌《收到收到》MV，邀請有份與他一起作曲的Gareth Chan陳考威女朋友Yanny，擔任MV女主角。作為《報復式浪漫》之後另一首冧爆情歌，MV畫面甜到漏，飾演100分女友的Yanny，會為只顧創作音樂將所有事情拋諸腦後的Jay Fung，安排好生活日常所需，甚至在家中每個角落貼上memo紙，提醒另一半飲水、食飯。Jay Fung坦言，每個男仔其實好清楚另一半對自己有幾好，《收到收到》這首歌，正好用來送給所有女朋友，多謝她們對另一半無條件的付出。
由Jay Fung與Gareth Chan一起作曲及監製、鍾雪填詞、Derrick Sepnio與蘇道哲負責編曲的新作《收到收到》，Jay Fung形容這是一首口語化、容易入心的冧歌，他說：「《收到收到》係《報復式浪漫》之後其中一首好sweet嘅情歌，其實我好多歌都好sweet嘅，但呢首就直接啲、易明啲、好口語化、歌詞快啲到心，首歌係代男仔多謝另一半去push自己成為一個 better person。」
MV內容以情侶間生活細節為主，Jay Fung飾演的角色，與普天下男士一樣，都是大頭蝦一族，例如去完廁所冇沖廁、用完廁紙未有更換、經常因為工作忘記吃飯、飲水，貼心的女友Yanny，於是將memo紙貼滿家中每一個角落作提示，處處為男友著想。Jay Fung不懂看中文，但導演要他拿著memo紙露出感恩女友關心的笑容，所以要旁邊的工作人員翻譯，讓Jay Fung入戲。
「好多謝Yanny做我MV女主角，今日拍嘅嘢都好順利、好自然，一來Yanny係一個好easy going（隨和）嘅女仔，二來今次呢首歌同我一齊作曲、監製嘅Gareth Chan係佢男朋友，所以佢好早之前已經聽過呢首歌，佢都好鍾意。」
問Jay Fung與女友間，有沒有因為生活瑣碎事情發生拗撬，他坦言：「都有，例如女朋友煮完飯，想我即刻洗碗，但我想睇一陣電視先，但佢會覺得洗咗碗之後可以咩都唔使理，安心睇電視，其實佢咁做，都係為咗我好，而《收到收到》呢首歌，就係想帶出呢個信息，希望大家都鍾意呢首歌。」
