【Viu】相隔4年再開演唱會嘅古巨基，噚晚超額完成one and only會展騷，騷後自評投入感100%！而每個嘉賓上台各有驚喜，如MC張天賦病咗仍保持高水準、Tyson Yoshi密實亮相被麒麟臂出賣、力臻晒基仔yes卡乘機騷肌等！
基仔笑話有個人仔比起佢自己對開騷更興奮，講緊嘅就係囝囝Kuson啦！佢一臉冧樣話喺綵排嗰陣有畀Kuson試踏台板，點知佢最後玩到唔捨得走！到喺on show接encore嘅時候，基仔驚見Kuson捱眼瞓撐足成場，曾一度心軟抱起佢上台，但最後因觀眾正離場嘅安全理由作罷，Kuson當堂眼濕濕，基仔話等下次開騷睇吓有冇機會父子檔演出！
呢次project邀請不同單位合作，身為樂壇前輩嘅基仔自言獲益良多，透露私下開咗個30人group chat，做「媒人」link up所有人，讓大家互相幫助！接住落嚟，基仔話將進行project嘅第二階段，搵singer-songwriter合作，呼籲大家提議「有緣人」，又謂有意將Kuson由細到大嘅BB聲集合成一首屬於佢嘅成長歌，成件事超有父愛！
