【Viu】Stanley邱士縉同Alice許寶恆今日出席Now TV活動，Stanley首次獻唱《野人老師》主題曲《重新介紹》，自評表現OK，仲有少少好聽添！講到有女學生Fans見到佢喜極而泣，Stanley都係第一次近距離見到Fans喊，最希望自己嘅正能量可以感染到Fans！而向來愛錫女友Alina嘅Stanley，有追看女友同193嘅新節目《Fashion Killer》，仲大方撩「九龍灣金剛棒」193「格劍」添！另外，Alice自認讀書時好百厭，有「馬騮仔」之稱，仲曳過男同學，但當時唔算靚女，所以唔多人追。
Stanley出席完活動就會合Edan呂爵安同Shirley陳欣妍，現身《非常貓狗反轉武林》慈善首映，除咗分享配音趣事，Stanley仲講笑話事前特登請教向有配音經驗嘅Edan添！講到被指喺叱咤頒獎禮，當Jeremy奪得「生力軍男歌手金獎」時感動到喊，Stanley就解釋只係有沙入眼，話絕對唔會承認呢件事，但好開心見到Jeremy得到肯定！大家明㗎啦！另外Edan亦有透露兄弟姜濤近況，Stanley仲表示最近有同姜濤一齊做Gym添！
