【Viu】ViuTV劇集《冰上火花》今日喺牛頭角開鏡，陳卓賢（Ian）、柯煒林、阿Gao（沈貞巧）、林愷鈴、Locker（林家熙）及Roberto（馬檇鏗）等都有出席，Ian影獨照嗰陣，成班嘩鬼喺後面搞搞震，其實佢哋早個幾月前已經開始學冰上曲棍球，所以感情好好，好似開party咁。
Ian預告喺劇入面會同林愷鈴、柯煒林有三角關係，佢仲講笑話自己同AK都有段感情線，雖然敵對關係但大家識英雄重英雄，仲補多句話「能成為密友大概總帶著愛」添，真係俾佢笑死！而林愷鈴分別同鏡仔唔同成員合作過，佢話最緊要觀眾投入到角色，自己可以同鏡仔合作好好彩，好開心。
至於Locker同Roberto分別嚟自試當真同微辣，Locker搞笑話佢哋不和，仲喺鏡頭面前鬥批踭搶鏡添。
