【Viu】Yoyo葛綽瑤今日為香檳品牌做一日店長，仲派福利請Fans飲酒兼合照，相當識做！Yoyo表示間中會同屋企人飲酒，所以酒量還好，除咗有一次同「3妹」郭嘉盈飲到嘔之外，未試過做「醉街女神」咁話！咁邊位圈中老友嘅酒量最好呢？Yoyo笑言一定唔係Sica，而係「酒后」娟姐呀！
最近忙於同ERROR拍攝《極度俏郎君》嘅Yoyo，未知同Dee哥有冇親熱戲，但若果有咀戲都唔介意。Yoyo又笑認進步咗，終於對保錡嘅笑話「免疫」，但依然會畀肥仔嘅肢體語言搞到搞笑。玩得咁開心，咁有冇飛睇ERROR騷呢？佢就慶幸有「員工福利」喇，只係對朋友嘅買飛請求愛莫能助，仲話要套用保錡金句：「我不是賣飛的！」添呀！
