【Viu】MIRROR最細成員Tiger後日就23歲生日啦！一眾小虎隊相當有心，連續兩年喺中環租借同一地方搞生日展應援，籌備足足兩個月嘅時間，展期由即日起至到4號，地下係公眾相展，有好多未曾曝光嘅絕密相，包括Tiger細個嘅相；二樓就係預約展區，除咗有紀念品發售之外，仲設有board game區、留言板、最精彩嘅仲有Tiger借出着過嘅戲服、拉丁舞服裝、《全民造星》tee，相信咁多位小虎隊打卡都打到手軟！
小幫手之一嘅Doris「入坑」3年，指雖然Tiger喺團內最細，但思想係最成熟，跳拉丁舞嗰陣魅力四射，同時又係運動高手，啲優點應該唔會數得完！佢透露FC之所以租借呢個場地原來有特別意思，因為Tiger好鍾意「哥哥」張國榮，而展覽斜對面正正就係哥哥拍電影《藍江傳》嘅取景地公利真料竹蔗水，所以佢哋今次都有同涼茶舖crossover，先邀請Tiger揀10首哥哥嘅金曲喺舖頭reloop，再搞個復古cosplay party，呢份細心真係無得輸！
提起Tiger最近獲邀擔任第16屆鮮浪潮國際短片節頒獎禮嘅頒獎嘉賓嗰陣，講咗番自稱係「下弦」嘅說話，事後被激讚好有鼓舞作用，Doris亦話睇到眼濕濕，並指咁多位小虎隊永遠都會記得Tiger曾經講過：「努力一定會被人看見！」
