【Viu】吳業坤今日喺觀塘出席父親節活動，秘婚後首次出席公開活動嘅佢，就未有帶同日籍太太現身，反而係帶咗吳媽媽嚟現場。活動上司儀林柏希問到坤哥而家日文係咪進步神速？坤哥怕羞咁話：「大家互相交流吓，我有教佢講廣東話，平日自己講得最多嘅日文係「大好き」，即係喜歡你。」
最近同保錡crossover咗首《原來他不夠猥瑣》，六日就已經有100k點擊，坤哥話自己同保錡好早就已經認識：「知道佢有出歌，然後我同佢首歌夾埋又幾ok，大家傾開就話不如快快手做咗佢拍出嚟，所以就有呢首歌出咗嚟。」稍後將會簽新唱片公司嘅坤哥，話都希望嚟緊可以打破傳媒同唔同電視台、藝人、歌手合作，問到佢之後係咪可以去唔同電視台唱歌同演出？坤哥話：「都要同公司開會傾下，之前都有其他電視台想搵我做主持。其實我之前同33（指193）個合作咗首歌，不過就仲未出街。」
講到新婚生活，坤哥話日籍太太現時喺香港：「不過嚟緊我會返內地拍劇，到時太太就會返一返日本。」問到幾時先正式帶太太見傳媒？坤哥就錫佳太太咁話：「其實點解好似收收埋埋咁呢，係因為怕太太唔慣香港嘅生活，唔慣呢行嘅運作，好似之前有追蹤朋友突然出嚟影相，太太都會嚇親，所以想佢習慣ok先。」講講下仲爆太太今日應該有私下嚟會場睇自己嘅工作情況，但係企喺邊度睇，坤哥就話自己都唔知。至於問到佢會唔會補擺酒嘅問題，坤哥話自己想擺嘅，但一切都要等疫情措施放寬先，而生小朋友嘅問題，佢話要儲多幾年錢先再諗。
