【Viu】天后鄭秀文（Sammi）今日化身「Mi姐」為超級市場做代言人，仲飾演超市員工拍咗條宣傳片，成件事貼地到不得了！Sammi又自認係街市控，更自封做「最新潮嘅師奶」，買餸從來都唔會假手於人，因為佢話好享受買餸嘅樂趣，又平衡到工作上嘅身份，同埋都只係過正常人嘅生活啫。話晒都天后出巡，係咪唔使講價就即刻多棵蔥先？Sammi笑話冇試過講價，相反佢自爆有儲超市印花呢舖癮，但唔會周圍問人攞印花嘅，因為怕肉酸！
提到佢今年獲封廣告銷售額女皇，Sammi謙稱盡力做好本分，咁幾時有新作畀大家睇到先？佢透露係有「拍咗啲嘢」，同埋希望明年可以再開紅館騷，所以都會籌備新歌，咁多大計真係令人好期待呀！
