【Viu】許靖韻（Angela）今日大露纖腰，同埋音樂人T-ma去新城電台宣傳7月2日晚嘅網上音樂會，咁啱今日係T-ma正日生日，大會貼心送上蛋糕同佢慶祝，講到生日願望，T-ma就話希望做好個騷！會唔會為咗個音樂會造番首歌先？佢哋透露最近的確合作咗首快歌，不過就應該趕唔切喺音樂會上獻唱啦！
早前Angela不幸中招，問到依家身體狀況？佢笑話其實佢係冇症狀患者，冇發燒、咳嗽，所以都唔會影響到唱歌，算係不幸之中嘅大幸！都有一段時間冇上台唱歌嘅佢，近日擔任張敬軒演唱會嘉賓大叫緊張，笑問軒仔有冇守承諾，私下着佢送嗰件小背心？Angela笑話未，不過相信對方一定會找數！另外，提到同門師兄陳家樂噚日宣布訂婚消息，佢話有即刻恭喜家樂，至於佢自己啦喎⋯ 佢搞笑話有排，因為依家都未搵Mr. Right！
