【Viu】COLLAR首個團綜《我哋係COLLAR》播出咗5集，噚晚節目完咗之後，佢哋孖住旁白君一齊開Live，適逢4號係Day 20歲生日，直播個時大家都有一齊迎接Day踏入2字頭嘅重要時刻，仲唱咗首生日歌賀壽星女添！Day分享生日願望就希望食極唔肥，果然離唔開食啊！難怪之前Ivy會影到Day瞓住覺都要食紫菜嘅片啦，仲放咗上IG同大家開心share，慶祝Day生日咁話喎！
講到慶祝，應該點都唔夠一班Night落力㗎啦！唔單止有大電視、燈箱廣告，仲有生日應援巴士添，Day都話好開心啊！唔知芯駖係咪聽完有Day巴士，想即刻去打卡，佢突然喺live消失，後尾入返直播嗰陣，芯駖就扮係特派記者，去到巴士站同大家匯報現場情況，仲話自己俾好多個Day包圍住，勁開心！真係笑死啊！而今日Ivy就真係走咗去坐Day嘅巴士打卡，勁有團愛啊！
