【Viu】「豹哥」陳蕾出晒名係「機迷」，佢熱愛打機嘅程度係會專登作首打機歌《屈機》，都算係前無古人、後無來者！而佢嘅實力亦終於獲得電競界嘅肯定，登上電競大舞台，豹哥話一直好恨都開一個平台做打機直播：「自問唔係打得比男仔差，我打機嘅賣點係寸同口氣大。（會唔會講粗口？）盡量直播冇，但冇鏡頭影住都係人之常情嚟嘅！」
唔好以為豹哥喺度齋噏，佢再自誇最近打爆咗隻勁hit、勁難玩嘅電競遊戲，仲咁啱係喺佢拎「CHILL CLUB 年度女歌手」銅獎嘅前一晚完成創舉，一次過慶祝兩件開心事！講到下個星期就同ToNick開騷，豹哥笑話好彩打爆機先可以專心籌備音樂會，睇嚟佢嘅生活真係離唔開打機～
