【Viu】樂隊ToNick嘅主音恆仔近排忙於為ViuTV新劇《和解在後》（暫名）執導兼演出，啱啱殺青就即刻歸隊出騷加籌備12月中同KOLOR嘅合體騷。恆仔笑話今次拍劇係「重肥」又「眾肥」，力讚Ivy So@COLLAR表現：「香港多咗個超級好嘅女演員！非常之驚為天人！」講到恆仔同Ivy So喺拍劇期間被途人影相擺上網，有網民誤會佢哋拍拖，恆仔聽到爆笑話係劇情嚟。而笑問事前有冇同女朋友小花報案？恆仔幽默答：「男人做嘢就梗係有問啦！」又指唔怕淑女小花呷醋，求生意志極高咁讚女朋友好大方！
久未唱過戶外騷嘅陳蕾大叫好有feel，有望下次再有個人演唱會首選西九場地。提起好友Jace陳凱詠爆被環球雪藏明年完約，問到會唔會游說華納動筆簽Jace？陳蕾直言唔使游說，只要對方願意就好快可以撮合，又話公司正欠缺Jace呢類型歌手，歡迎對方約滿加入。
