【Viu】張敬軒噚日出席英皇嘅元宇宙發佈會，除咗介紹元宇宙嘅「冚家軒」新成員HC外，仲首播新歌MV《元宇宙之戀》，好揼本呀！軒公透露密鑼緊鼓喺元宇宙打造緊Hinsland，仲預告會喺Hinsland開騷，果然夠潮！
講返下周二舉行嘅16場補場演唱會，軒公預告會有全新嘉賓陣容，但唔會過量操練，因為「阿叔」年紀唔細，頂盡都係露吓手臂。佢又自爆為咗拍MV，用咗168斷食法令Jawline重現，加上「整容級」嘅化妝同髮型，先有「回春」效果！
此外，軒公早前首次用電話拍攝微電影《前夫的愛》，佢大呻男團pose好難擺，加上4張嘢要扮廿幾歲真係搞唔掂，又搞笑話：「多謝Photoshop！」軒公話最難扮係隊長Lokman，因為自己十幾年冇剷過skinhead，加上頭形冇對方咁靚，點扮都唔似，前輩真玩得呀！
