【now.com】尖沙咀地鐵縱火悲劇，當時幾乎第一時間就有現場片段睇到傷者在月台上被火燒情況。有好多反應，當中有人覺得咁多人圍住拍片，但得幾個人幫手救火救人，或者逃生。吳業坤（坤哥）係其中一個。佢在自己Facebook留咗一句：「火燭當然是要拍片放上網緊要過逃生啦！」但可能驚人話佢抽水，打完後快速刪除。雖然稍為有閱讀能力嘅人都知道佢係曲線，但一樣被人鬧到飛起。其實佢嘅想法冇錯，亦點出其中一個問題所在，同一個話題同一個角度，杜汶澤直線抽擊就冇事，坤哥就中招。
點講都好，坤哥係唔啱嘅，起碼犯咗三大錯。
1. 曲線冇寫明，呢個好重要，多年社交網絡訓練，最重要一點就係唔好睇高或睇低受眾，尤其係理解能力，你永遠唔知道係乜嘢人睇緊你個post，可能佢係第一次上網都未定。
2. 死人冧樓嘢真係唔好亂加把嘴，係講都要義正詞嚴，用直線，嗰啲小器反話留番真正好笑荒唐事先用吧。
3. 睇少自己吸嬲能力，此一時彼一時，當初坤哥有幾吸like，?家就有幾吸嬲，雖然話做人處事總有讚有彈，但呢一刻Overall嚟講，唔知點解，係負面嘅。
由台慶扮棋，到連攞兩屆叱咤，其實只不過兩年時間左右。兩年前，係網民將佢由一隻棋褒到成層樓咁高，入五強就戥佢開心，到攞到直頭係興奮。呢啲小人物做大事嘅故仔永遠都勵志，典型鋤強扶弱心態，明嘅。唔明嘅係，點解呢個大家捧起嘅人，兩年後又要踩返落地底？莫非佢變得好強？唔係啩？?家佢真係講乜都被人鬧，好慘，查實佢不嬲都係咁樣出Post。
佢攞到兩屆叱咤，唔係冇原因嘅，一來係因為池中無魚蝦自大，一池死水，魚向北游，蝦仔先有得出頭。二來叱咤不嬲都鍾意買大細，有得揀吳業蝦定陳柏蝦，最後買重坤蝦，以為佢攞獎有上年咁大迴響，結果冇，雙贏變雙輸。
做戲又係，《幸運是我》演車房仔，第一次提名金像獎，又被人鬧，新人獎咋喎？提名咋喎？咁都唔得。好懷疑?家究竟係咪有支放大縮細槍在手，鍾意就變大佢，唔高興就縮細佢，咁就好過癮喇。
講真佢兩年來佢都冇乜點變，一樣係隻棋，分別只係被TVB點，定係被其他人點。兩邊佢都控制唔到，唯一好處係比以前叫做搵到個錢，但仲可以搵幾耐？冇人知㗎，睇心情啦。
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
